籃足手排聽得多,唔知大家聽過「巧固球」未?其實呢項運動喺香港都有一段時間啦,香港隊都已經攞過啲獎項,而巧固球……嘅背景資料就自己上Google查吓啦(呢個並唔係我哋嘅重點),今次我哋想喺訓練方面講吓呢項運動。

雖然有幾十年歷史,但呢一項運動嘅研究一啲都唔多,所以都未搵到徹底嘅運動分析。不過,佢同幾項運動都有啲相似:

  • 手球
  • 排球
  • 投球

點樣似法?手球我諗唔使多講,只要你睇過片,而你又咁啱未玩過巧固球,唔少人都會覺得兩者喺差唔多。的確,巧固球揮臂嘅動作、射球嘅方式都好相似,尤其射球嗰時,都係要單腳彈起淩空飛起轉體翻騰三周半先射;而且要卒個波嘅入射角,所以前臂、手腕嘅變化都好大

而當防守時,球員會蹲到好低(Low Squat),甚至跪埋嚟接波,而呢一點就同排球嘅救波(Dig Shot)幾相似:除咗要求反應,仲需要Getting Low 嘅能力

而整個比賽過程中,巧固球就好似好憎個地面咁,個波基本上唔可以掂個地板,情況同投球好類似,所以會出現好多嘅長傳,因為基本冇乜得帶波。

Again,要訓練體能,首先就要知道你項運動點運作。雖然未有靚靚嘅數據話我哋知巧固球嘅動作,但係由上面嘅分析都已經可見一斑。不過如果想再仔細啲,就要下次一齊研究吓佢嘅生理要求,以及一齊諗吓佢嘅週期訓練啦。

⭐️⭐️⭐️⭐️⭐️⭐️⭐️⭐️⭐️⭐️⭐️⭐️⭐️⭐️
想搵我哋訓練?又或者想了解更多我哋嘅資訊?
去 Sportential 運動潛能資訊 再睇多啲!
直接Inbox我哋仲方便~
⭐️⭐️⭐️⭐️⭐️⭐️⭐️⭐️⭐️⭐️⭐️⭐️⭐️⭐️

Reference:

  1. Wing C. Implementing a Strength and Conditioning Program for Tchoukball. Strength Cond J. 2015;37(5):53–9.
廣告