運動歷史好長,為得到更好成績,自古至今,運動員都努力練習。亦都因為咁,我哋見証著記錄不斷被刷新。香港好多運動人都以此為目標,努力練習。但點解,整體上都輸畀外國?其中一個原因— 香港傳承概念好強烈。

 

香港可能落後十年

坦白講,香港普遍運動訓練知識,可能比外國慢十年以上。當世界仔細改善緊週期訓練,香港可能仲有唔少人連賽前期係乜都唔知;當外地好聰明地使用補充品,香港仲以為食蛋白粉就會變大隻。當外國講緊動態平衡力時,香港仲做緊BOSU單腳企。

其中最恐佈,係香港嘅訓練方法,以及訓練排程,落後到我要用例子先講到。

 

挪威訓練演變

十年多前,挪威做咗一個回溯研究,睇下 1970-2001年間,28位喺歐洲、世界及奧運划艇項目嘅獎牌得主,訓練上轉變如何。喺體能上,最高攝氧以及帶氧爆發力,都隨著年月進步。訓練又點呢?喺30年間,訓練量大概增加左20%。即係要練多啲?

 

聽埋先,雖然訓練量上升,但係內容係明顯變化:其中高強度乳酸訓練由 23hr/month 減至 7hr/month。增加嘅,係低乳酸訓練量,由30hr/month 加至 50hr/month。點解會咁,除左因為週期訓練演變外,增加低強度訓練,可以令肌肉更好適應,以及令技術穩定性更加。相信好多運動員都試過,突然做到一個新技巧,但又唔係成日做得返。

 

不是傳承!是承先啟後!

反觀香港,訓練計劃好多時都係代代相傳,只會好間中加入新元素,但又未必持久。經常覺得,問題在於運動員好少問「點解要咁做?」例如:

 

1)點解高質高量(全速/全力,而做好多次);

2)點解早午晚都會練習,內容有冇注意地方;

3)點解比賽前要咁咁咁訓練;

4)點解休息時間係咁多/少,等等。

作為運動員,運動成績係自己嘅,教練會畀佢最好嘅嘢你,但你自己冇任何意念加入,充其量,你只會係二流。面對過好多運動員,莫講話訓練目標,連明確講到自己強弱項都做唔到。試問如果只有教練付出,香港運動又點可以有大進步呢?

你又有冇對自己負責任?

 

Reference:

1. Seiler KS. Training and performance characteristics among Norwegian International Rowers 1970 – 2001. 2004;303–10.

⭐️⭐️⭐️⭐️⭐️⭐️⭐️⭐️⭐️⭐️⭐️⭐️⭐️⭐️

Sportential 運動潛能資訊  再睇多啲!

⭐️⭐️⭐️⭐️⭐️⭐️⭐️⭐️⭐️⭐️⭐️⭐️⭐️⭐️

廣告